लडाकुलाई आरोपै-आरोप

रसौली चैनपुर (चितवन), कार्तिक १७ - शान्ति सम्झौता बमोजिम पुर्नस्थापना र समायोजन ढिलाई हुँदा अनेक आरोप लाग्ने गरेको माओवादी लडाकुहरुको गुनासो छ । शिविरबाट हटाइएका अयोग्य लडाकुलाई तालिम दिएको हल्ला फैलिएपछि आरोप खण्डन गरिरहेका छन्, लडाकुहरु ।
समायोजनमा ढिलाइ गर्दा अनेक आरोप खेप्नुपर्ने भएकोले छिटो समाधान खोज्न लडाकुहरुको माग छ । 'प्रमाणिकरणमा नपरेकालाई शिविरको नियन्त्रणमा तालिम दिएको भन्ने कुरा वाहियात हो,' तेस्रो डिभिजनका प्रबक्ता जनक बिष्टले कान्तिपुरसँग भने, 'हामी शान्तिको परिधी नाघेर कुनै क्रियाकलाप गर्देनौं ।' प्रमाणिकरणमा नपरेका लडाकुहरुलाई रोजगारको ब्यबस्था गर्न उनले माग गरे ।
संयुक्त राष्ट्रसंघिय मिसन (अनमिन) को प्रमाणिकरणमा नपरेका लडाकुहरुलाई तालिम दिएको हल्ला निराधार भएको कमाण्डरहरुको दाबी छ । कमाण्डरहरुले अनमिनको प्रमाणिकरणबाट बर्हिगमनपछि हालसम्म कुनै अयोग्य लडाकुलाई शिविर प्रबेश नगरिएको बताएका छन् ।
'हाम्रा प्रमाणिकरणमा नपरेका साथीहरु आ-आफ्नो घरमा फर्किसकेका छन्,' रसौली चैनपुर स्थित सहायक शिविरका सहकमाण्डर रमेशले भने, 'केहि अयोग्य लडाकु बिभिन्न अन्तराष्ट्रिय दातृ संस्थाको सहयोगमा सीपमुलक तालिम लिइरहेका छन् ।'
केहि आफ्नै घरायसी काममा लागेका तथा बाँकी माओवादीमा सक्रिय रहेको उनले बताए । 'अहिले त हाम्रै पुर्नस्थापना र समायोजन मुख्य प्रश्न हो,' उनले भने, 'प्रमाणिकरणमा नपरेकालाई हामीले तालिम दिने वा प्रवेश गराउने कुरै आउँदैन ।'
लडाकु समायोजन हुनेमा आशंका
सरकार माओबादीबीच भएको सम्झौता अनुसार समायोजन प्रक्रिया समयमै हुनेमा लडाकुले आशंका ब्यक्त गरे । दलहरुको निर्णय नै हाम्रा लागि सहि मार्गदर्शक हुने भएकोले समायोजन प्रक्रियालाई आग्रह पुर्वाग्रह रुपमा हेर्न नहुने उनीहरुको धारणा छ । 'समायोजन ढिला गरेर अनेक आरोप लगाई हामीलाई अत्याउने खेल भइरहेको छ,' प्रवक्ता बिष्ट भन्छन्, 'तर हामीले जे जस्ले जस्ता आरोप लगाएपनि डगमगाउने छैनौं ।'
एक बर्ष अघि अनमिनको प्रमाणिकरणमा शक्तिखोरस्थित मुख्य र तीन सहायक शिविरमा ३ हजार ९ सय ५० जना लडाकु रहेका थिए । प्रबक्ता बिष्टका अनुसार,  बिभिन्न कारणले अहिलेसम्म २५ जना लडाकुले शिविर छोडेर गएका छन् । हाल सरकारले रासनपानी, लत्ताकपडा लगायत प्रति लडाकु मासिक ५ हजारका दरले रकम दिंदै आएको छ । 
'हामी अझै पनि अर्ध सरकारी सैन्य हौं,' प्रबक्ता बिष्ट भन्छन्, 'पार्टीको आदेशलाई पनि बेवास्ता गर्न सकिन्न, सरकारको नियम कानुनलाई पनि उलंघन गर्ने कुरै आउँदैन
www.ekantipur.com