रुवेल चौधरी बिरुद्धको रिटमा सोमबार सुनुवाइ हुने

काठमाडौ, पुस १० - गैरकानुनी कार्यमा संलग्न रहेकाले हदैसम्मको कारबाहीको माग गर्दै उप्रधानमन्त्री सुजाता कोइरालाका ज्वाइ बङ्गलादेशी नागरिक रुवेल चौधरीविरुद्ध सर्वोच्च अदालतमा दायर भएको मुद्दाको सुनुवाइ आगामी सोमबार हुने भएको छ ।

राससले जनाए अनुसार समय अभावका कारण चौधरीविरुद्धको मुद्दाको सुनुवाइ शुक्रबार हुन नसकेकाले सोमबारका लागि सारिएको सर्वोच्च अदालतका प्रवक्ता श्रीकान्त पौडेलले बताएका हुन् ।
चौधरी बिरुद्ध सिन्धुपाल्चोकका दइन्द्र बहादुर ठकुरीले बिहीबार उनको गैरकानुनी धन्दाको छानविन गरी कारवाही गराउन तथा उनलाई साथ दिने उच्च तहका राजनीतिक तथा प्रशासनिक अधिकारीहरुलाई कारवाही गराउन माग गर्दै रिटमा दायर गरेका थिए । उनले रिटमा प्रधानमन्त्रीको कार्यालय, उपप्रधान मन्त्री सुजाता कोइराला, गृह मन्त्रालय, प्रहरी महानिरीक्षकको कार्यालय र चौधरीलाई विपक्षी बनाइएको छ ।
रिटमा उनले विभिन्न पत्रपत्रिकामा आएका विवरणहरुलाई प्रमाणको रुपमा पेश गर्दै चौधरी नेपाल प्रहरीको सुडानस्थित राष्ट्रसंघीय मिसनमा गरेको खरिद घोटलाको प्रमुख व्यक्ति रहेको, नेपाली टेलीकमको कल वाइपास (भीओआइपी) गर्ने कार्यमा संलग्न रहेको, शुक्ष्म मेमोरियल ट्रष्टमा अबैधानिक रुपमा काम गरेकोलगायतका आरोपहरु लगाईएको छ ।

यि कार्यहरुबाट उन्मुक्तिको लागि सासु कोइरालाको प्रभावलाई दुरुपयोग गरेको तथा सुडान काण्डको छानविन नगराउन प्रधानमन्त्री नेपालले अख्तियार दुरुपयोग अनुसन्धान आयोगलाई दवाव दिएको समेत उल्लेख गरिएको छ ।